Proverbs 9
1ⲁⲧⲥⲟⲫⲓⲁ ⲕⲉⲧⲟⲩⲏⲓ ⲛⲁⲥ ⲁⲩⲱ ⲁⲥⲧⲁϫⲣⲟ ⲛⲥⲁϣϥ ⲛⲥⲧⲩⲗⲟⲥ 2ⲁⲥⲕⲱⲛⲥ ⲛⲛⲉⲥϣⲱⲱⲧ ⲁⲥⲕⲉⲣⲁ ⲙⲡⲉⲥⲏⲣⲡ ⲉⲩϩⲛⲁⲁⲩ ⲁⲥⲥⲟⲃⲧⲉ ⲛⲧⲉⲥⲧⲣⲁⲡⲉⲍⲁ 3ⲁⲥϫⲟⲟⲩ ⲛⲛⲉⲥϩⲙϩⲁⲗ ⲉⲥⲙⲟⲩⲧⲉ ϩⲛⲟⲩⲛⲟϭ ⲛⲧⲁϣⲉⲟⲉⲓϣ ⲉϫⲙⲡⲉϩⲛⲁⲁⲩ ⲉⲥϫⲱ ⲙⲙⲟⲥ 4ϫⲉ ⲡⲁⲑⲏⲧ ⲉⲧⲛϩⲏⲧⲧⲏⲩⲧⲛ ⲙⲁⲣⲉϥⲣⲁⲕⲧϥ ϣⲁⲣⲟⲓ ⲁⲩⲱ ⲡⲉϫⲁⲥ ⲛⲛⲉⲧϣⲁⲁⲧ ⲛⲥⲃⲱ 5ϫⲉ ⲁⲙⲉⲓⲧⲛ ⲛⲧⲉⲧⲛⲟⲩⲱⲙ ⲉⲃⲟⲗ ϩⲛⲛⲁⲟⲉⲓⲕ ⲁⲩⲱ ⲛⲧⲉⲧⲛⲥⲱ ⲙⲡⲁⲏⲣⲡ ⲛⲧⲁⲓⲕⲉⲣⲁ ⲙⲙⲟϥ 6ⲕⲱ ⲛⲥⲱⲧⲛ ⲛⲧⲙⲛⲧⲁⲑⲏⲧ ϫⲉ ⲉⲧⲉⲧⲛⲉⲱⲛϩ ⲛⲧⲉⲧⲛϣⲓⲛⲉ ⲛⲥⲁⲧⲙⲛⲧⲣⲙⲛϩⲏⲧ ϫⲉ ⲉⲧⲉⲧⲛⲉⲣⲁϩⲉ ⲁⲩⲱ ϫⲉ ⲉⲧⲉⲧⲛⲉⲥⲟⲟⲩⲧⲛ ⲛⲧⲙⲛⲧⲣⲙⲛϩⲏⲧ ϩⲛⲟⲩⲥⲟⲟⲩⲧⲛ ⲙⲉⲉⲩⲉ ⲉⲧⲉⲥⲃⲱ ϩⲛⲟⲩϩⲓⲏ ⲉⲥⲥⲟⲩⲧⲱⲛ 7ⲡⲉⲧϯⲥⲃⲱ ⲛⲛⲉⲑⲟⲟⲩ ⲉϥⲛⲁϫⲓ ⲛⲁϥ ⲛϩⲉⲛⲥⲱϣ ⲉⲣⲉⲟⲩⲥⲱϣ ⲇⲉ ⲛⲏⲩ ⲉϫⲛⲛⲉⲑⲟⲟⲩ ϩⲙⲡⲉⲧⲟⲩϭⲱϣⲧ ⲉⲃⲟⲗ ϩⲏⲧϥ ϩⲉⲛⲉⲗⲉⲗⲕⲏⲙⲉ ⲛⲉ ⲛⲉϫⲡⲓⲟ ⲉⲧϣⲟⲟⲡ ⲙⲡⲁⲥⲉⲃⲏⲥ 8ⲙⲡⲣϫⲡⲓⲉⲛⲉⲑⲟⲟⲩ ⲇⲉ ⲛⲛⲉⲩⲙⲉⲥⲧⲱⲕ ϫⲡⲓⲉⲟⲩⲥⲁⲃⲉ ⲧⲁⲣⲉϥⲙⲉⲣⲓⲧⲕ 9ϯⲧⲁⲫⲟⲣⲙⲏ ⲛⲟⲩⲥⲟⲫⲟⲥ ⲧⲁⲣⲉϥⲣϩⲟⲩⲉⲥⲟⲫⲟⲥ ⲙⲁⲧⲁⲙⲉⲡⲇⲓⲕⲁⲓⲟⲥ ⲧⲁⲣⲉϥϣⲣⲡⲥⲟⲟⲩⲛ ⲛϩⲟⲩⲟ 10ⲧⲁⲣⲭⲏ ⲛⲧⲥⲟⲫⲓⲁ ⲧⲉ ⲧⲙⲛⲧⲙⲁⲓⲛⲟⲩⲧⲉ ⲧⲙⲛⲧⲣⲙⲛϩⲏⲧ ⲇⲉ ⲛⲛⲉⲧⲟⲩⲁⲁⲃ ⲡⲉ ⲡϣⲣⲡⲥⲟⲟⲩⲛ ⲡⲁⲟⲩϩⲏⲧ ⲇⲉ ⲉⲛⲁⲛⲟⲩϥ ⲡⲉ ⲡⲉⲓⲙⲉ ⲉⲡⲛⲟⲙⲟⲥ 11ϩⲙⲡⲉⲓⲥⲙⲟⲧ ⲅⲁⲣ ⲉⲕⲛⲁⲣⲟⲩⲛⲟϭ ⲛⲁϩⲉ ⲁⲩⲱ ⲥⲉⲛⲁⲟⲩⲱϩ ⲉⲣⲟⲕ ⲛϩⲉⲛⲣⲙⲡⲟⲟⲩⲉ ⲛⲱⲛϩ 12ⲡⲁϣⲏⲣⲉ ⲉⲕϣⲁⲛⲣⲥⲟⲫⲟⲥ ⲉⲕⲛⲁⲉⲓⲣⲉ ⲛⲁⲕ ⲙⲛⲡⲉⲧϩⲓⲧⲟⲩⲱⲕ ⲉϣⲱⲡⲉ ⲇⲉ ⲉⲕϣⲁⲛⲑⲟ ⲉⲕⲛⲁⲥⲉⲕⲡⲉⲑⲟⲟⲩ ⲛⲁⲕ ⲟⲩⲁⲁⲕ ⲡⲉⲧⲧⲁϫⲣⲟ ⲙⲙⲟϥ ⲉϫⲛϩⲉⲛϭⲟⲗ ⲡⲁⲓ ⲉϥⲙⲟⲟⲛⲉ ⲛϩⲉⲛⲧⲏⲩ ⲁⲩⲱ ⲉϥⲡⲏⲧ ⲛⲥⲁϩⲉⲛϩⲁⲗⲁⲧⲉ ⲉⲩϩⲏⲗ ⲁϥⲕⲱ ⲅⲁⲣ ⲛⲥⲱϥ ⲛⲛⲉϩⲓⲟⲟⲩⲉ ⲙⲡⲉϥⲙⲁⲛⲉⲗⲟⲟⲗⲉ ⲁⲩⲱ ⲁϥⲣⲡⲱⲃϣ ⲛⲛⲉϩⲓⲟⲟⲩⲉ ⲛⲧⲉϥⲥⲱϣⲉ ⲙⲙⲓⲛ ⲙⲙⲟϥ ⲉϥⲙⲟⲟϣⲉ ϩⲓⲧⲛⲟⲩϫⲁⲓⲉ ⲛⲁⲧⲙⲟⲟⲩ ⲁⲩⲱ ϩⲛⲟⲩⲕⲁϩ ⲉϥϣⲏϥ ϩⲛⲟⲩⲉⲓⲃⲉ ⲉϥⲥⲟⲩⲱϩ ⲇⲉ ⲉϩⲟⲩⲛ ⲛⲛⲉϥϭⲓϫ ⲑⲛⲟⲩϣⲱⲱⲃⲉ 13ⲟⲩⲛⲟⲩⲥϩⲓⲙⲉ ⲛⲁϣⲧⲙⲙⲉ ⲁⲩⲱ ⲛⲁⲑⲏⲧ ⲛⲁⲣϭⲣⲱϩ ⲙⲡⲟⲉⲓⲕ ⲧⲁⲓ ⲉⲧⲉ ⲛⲥⲥⲟⲟⲩⲛ ⲁⲛ ⲙⲡϣⲓⲡⲉ 14ⲁⲥϩⲙⲟⲟⲥ ϩⲓⲣⲛⲑⲛⲣⲟ ⲙⲡⲉⲥⲏⲓ ϩⲓⲟⲩⲧⲟϭⲥ ⲉⲥⲟⲩⲟⲛϩ ⲉⲃⲟⲗ ϩⲓⲛⲉⲡⲗⲁⲧⲓⲁ 15ⲉⲥⲙⲟⲩⲧⲉ ⲉⲛⲉⲧⲡⲁⲣⲁⲅⲉ ⲁⲩⲱ ⲛⲉⲧⲥⲟⲩⲧⲱⲛ ϩⲓⲛⲉⲩϩⲓⲟⲟⲩⲉ ⲉⲥϫⲱ ⲙⲙⲟⲥ 16ϫⲉ ⲛⲓⲙ ⲡⲉ ⲡⲁⲑⲏⲧ ⲉⲧⲛϩⲏⲧⲧⲏⲩⲧⲛ ⲙⲁⲣⲉϥⲣⲁⲕⲧϥ ϣⲁⲣⲟⲓ ϯⲟⲩⲁϩⲥⲁϩⲛⲉ ⲇⲉ ⲛⲛⲉⲧϣⲁⲁⲧ ⲛⲥⲃⲱ ⲉⲓϫⲱ ⲙⲙⲟⲥ 17ϫⲉ ⲟⲩⲱⲙ ⲛϩⲉⲛⲟⲉⲓⲕ ⲉⲩϩⲏⲡ ϩⲛⲟⲩⲟⲩⲣⲟⲧ ⲙⲛⲟⲩⲙⲟⲟⲩ ⲑⲛϫⲓⲟⲩⲉ ⲉϥϩⲟⲗϭ 18ⲛϥⲥⲟⲟⲩⲛ ⲇⲉ ⲁⲛ ϫⲉ ⲉⲣⲉⲛⲣⲱⲙⲉ ⲙⲟⲩ ϩⲁⲧⲏⲥ ⲁⲩⲱ ⲉⲥⲧⲱⲙⲛⲧ ⲉⲡⲡⲁϣ ⲛⲁⲙⲛⲧⲉ ⲁⲗⲗⲁ ⲡⲱⲧ ⲉⲡⲟⲩⲉ ⲛⲅⲧⲙⲱⲥⲕ ϩⲙⲡⲉⲥⲙⲁ ⲁⲩⲱ ⲙⲡⲣⲥⲙⲛⲛⲉⲕⲃⲁⲗ ⲉϩⲟⲩⲛ ⲉϩⲣⲁⲥ ⲧⲁⲓ ⲅⲁⲣ ⲧⲉ ⲑⲉ ⲉⲧⲕⲛⲁϫⲓⲟⲟⲣ ⲛⲟⲩⲙⲟⲟⲩ ⲉⲛⲡⲱⲕ ⲁⲛ ⲡⲉ ⲁⲩⲱ ⲉⲕⲛⲁⲟⲩⲱⲧⲃ ⲛⲟⲩⲉⲓⲉⲣⲟ ⲛϣⲙⲙⲟ ⲥⲁϩⲱⲕ ⲉⲃⲟⲗ ⲑⲛⲟⲩⲙⲟⲟⲩ ⲉⲛⲡⲱⲕ ⲁⲛ ⲡⲉ ⲁⲩⲱ ⲙⲡⲣⲥⲱ ϩⲛⲟⲩⲡⲏⲅⲏ ⲛϣⲙⲙⲟ ϫⲉ ⲉⲕⲉⲣⲟⲩⲛⲟϭ ⲛⲁϩⲉ ⲡⲉⲧϩⲱⲛ ⲅⲁⲣ ⲉϩⲟⲩⲛ ⲉⲧⲁⲓ ϥⲛⲁⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲡⲉⲧⲛⲁⲥⲁϩⲱϥ ⲇⲉ ⲉⲃⲟⲗ ϥⲛⲁⲟⲩϫⲁⲓ ⲁⲩⲱ ϥⲛⲁⲱⲛϩ ⲉⲩⲟⲩⲟⲉⲓϣ ⲛⲁϩⲉ ⲥⲉⲛⲁⲟⲩⲱϩ ⲇⲉ ⲉⲣⲟϥ ⲛϩⲉⲛⲣⲙⲡⲟⲟⲩⲉ ⲛⲱⲛϩ 19
Copyright information for
CopSahBible2